नेदरल्याण्डका एक ३३ वर्षीय व्यवसायी जिम हाफेन्सले उक्त नयाँ बिजनेस मोडेल पेश गरेका छन् । जस अनुसार त्यहाँ शुक्रबार छिरेका विवाहित दम्पती आइतबारसम्ममा डिभोर्स गरेर निस्किन्छन् ।

डिभोर्स होटलमा के हुन्छ ?

उक्त अनौठो होटलमा तपाईंलाई डिभोर्सको सम्पूर्ण प्याकेज उपलब्ध छ । वकिल तथा मध्यस्थकर्ताको टिमले तपाईंलाई पर्खिरहेको हुन्छ । शुक्रबार होटलमा चेकइन गर्नुहोस्, आफ्नो वैवाहिक सम्बन्धलाई पूर्ण विराम लगाउनुहोस् र आइतबार डिभोर्सका कागजात लिएर बाहिर निस्किनुहोस् । यसका लागि निश्चित शुल्क तिर्नुपर्छ र उक्त प्रक्रियालाई रियालिटी टिभी शोमा पनि परिणत गर्न सकिन्छ ।

यो होटलमा यस्तो माहोल दिइन्छ ताकि दम्पतीको डिभोर्स सहज बनोस् । त्यहाँ सम्बन्ध विच्छेदको लामो तथा कठिन कानूनी बाटोबाट गुज्रिनुको साटो एउटा सजिलो बाटो प्रदान हुन्छ । होटलमा एउटा यस्तो वातावरण तथा व्यवस्था बनाइएको हुन्छ जसले एकै पटकमा एकसाथ कानुनी सल्लाह, मनोवैज्ञानिक साथ तथा मध्यस्थता प्रदान गर्दछ । यसबाट डिभोर्सको प्रक्रियालाई कुनै तनावबिना तथा शान्तिपूर्वक अन्त्य गरिन्छ ।

यो होटल नेदरल्याण्डको हार्लेम सहरमा रहेको छ । यसको नाम The Separation Inn हो । अहिलेसम्म १७ दम्पतीले यो होटलबाट सेवा प्राप्त गरिसकेका छन् र त्यसमध्ये १६ जोडीले सफलतापूर्वक डिभोर्स गरे । यो होटलको शाखा अब अमेरिकामा पनि खोल्ने योजना बनाइएको छ । न्युयोर्कदेखि लस एन्जल्स लगायतका ठूला सहरमा उक्त होटल स्थापना गरिनेछ ।

अमेरिकामा सम्बन्ध विच्छेदसम्बन्धी चर्चित वकील रोबर्ट एस कोहेन चाहिं यस्तो होटलको अवधारणाका विरोधी हुन् । उनी भन्छन्- यो आइडिया सुन्नमा जति आकर्षक छ, उत्ति नै अव्यवहारिक पनि छ । डिभोर्सको समय निकै भावनात्मक हुन्छ र दुई दिनमा सबै कुरा सुल्झाउनु जोकोहीका लागि सम्भव हुँदैन । यसलार्य एउटा बिजनेस तथा प्याकेजका रुपमा पेश गर्नु कुनैपनि अर्थमा सही होइन ।

एक रिपोर्ट अनुसार अमेरिकामा डिभोर्स उद्योग १ खर्ब ७५ अर्ब डलरसम्म पुगेको छ । त्यहाँ हरेक वर्ष १२ लाख जोडीले डिभोर्सका लागि आवेदन गर्छन् । यस्तोमा डिभोर्स होटलले उक्त विशाल बजारमा हलचल मच्चाउने पक्का छ ।