दिपायल- सुदूरपश्चिम विश्वविद्यालय  अन्तर्गतको सीताराम बहुमुखी क्याम्पस उच्चाकोटको  स्ववियु अध्यक्षमा नेविसंघका उमेश बलायर निर्वाचित भएका छन् । अध्यक्ष बलायरसहित नेविसंघका सम्पूर्ण पदाधिकारी सर्वसम्मत निर्वाचित भएका हुन् ।

अध्यक्षमा निर्वाचित बलायर दोस्रो पटक स्ववियु अध्यक्षमा निर्वाचित भएका हुन् ।

निर्वाचन अधिकृत चेतराज भट्टका अनुसार उपाध्यक्षमा मनिषा कुमारी भट्ट ( रोस्यारा ), सचिवमा ललित बहादुर साउद, सह सचिवमा लक्ष्मी कुमारी विक, कोषाध्यक्षमा कविता कुमारी बलायर निर्वाचित भएका हुन् ।

सदस्यहरुमा टिकेश्वरी जैसी, शोभा बलायर, माया बलायर, यशोदा कुमारी भट्ट, शारदा खडक र लालमनी भट्ट निर्वाचित भएका छन् ।

निर्वाचित पधाधिकारीहरुलाई बिहीबार सपथ तथा पदभार ग्रहण गराइएको छ । शिखर नगरपालिकाका नगर प्रमुख दीर्घ बहादुर बलायरको प्रमुख आथित्यतामा कार्यक्रमको आयोजना गरिएको हो ।

नवनिर्वाचित पदाधिकारीहरुलाई बधाई ज्ञापन गर्दै नगर प्रमुख बलायरले क्याम्पसको शैक्षिक उन्नतिका लागि नगर सरकारले  समन्वय, सहकार्य र सक्दो सहयोग गर्दै आइरहेको बताए । स्ववियु निर्वाचन विद्यार्थीहरुले आफ्नो पढाईसँगै शैक्षिक संस्थाको हितका लागि, विद्यार्थीको हकहितका लागि काम गर्नु पर्ने उनको भनाइ थियो ।

क्याम्पसका विद्यार्थीहरुलाई मध्यनजर गर्दै क्याम्पसमा लोक सेवाको तयारी कक्षा सञ्चालन गर्न नगर सरकारले दुई लाख बजेट विनियोजित गरेको नगर प्रमुख बलायरले बताए ।

नव निर्वाचित स्ववियु अध्यक्ष उमेश बलायरले क्याम्पसको शैक्षिक उन्नति, विद्यार्थीको हक हितसँगै सुदूरपश्चिम विश्व विद्यालयको हकहित र त्यो अन्तर्गतका क्याम्पसमा अध्ययनरत विद्यार्थीहरुको हितमा काम गर्ने वाचा गरे ।