बझाङ — बझाङका भूकम्पपीडितका निजी आवास पुनर्निर्माण र मर्मतकार्यलाई तिव्रता दिन जिल्ला भूकम्पीय पुनर्निर्माण तथा पुन:स्थापना आयोजना कार्यान्वयन इकाइको स्थापना भएको छ । राष्ट्रिय विपद जोखिम न्युनिकरण तथा व्यवस्थापन प्राधिकरणले कार्यालय स्थापना गरेर पुनर्निर्माणको काम अघि बढाउन लागेको हो ।

बझाङको जयपृथ्वी नगरपालिका–९ देवलमा स्थापना भएको कार्यालयको गृहमन्त्री रमेश लेखकले शुक्रबार उद्घाटन गरेका छन् । कार्यक्रममा बोल्दै मन्त्री लेखकले पश्चिम नेपालमा भूकम्पले पारेको क्षतिको पुनर्निर्माण अभियान सुरु भएको बताए । पुनर्निर्माणको लागि आवश्यक मापदण्ड र नियामावलीसँगै आवश्यक बजेट व्यवस्था गरेपछि निजी आवास पुनर्निर्माणको कामलाई तिव्रता दिन जिल्लामै कार्यालय स्थापना गरिएको उनको भनाइ छ ।

पश्चिम नेपालमा गएको भूकम्पको क्षतिलाई केन्द्रित गर्दै अछाम र जाजरकोटमा पनि प्राधिकरणले कार्यालय स्थापना गरेर पुनर्निर्माण गर्ने उनले जानकारी दिए । ‘निजी आवासको पुनर्निर्माणको कार्यसँगै सरकारी भवनहरुको पुनःनिर्माणको लागि कार्यान्वयन इकाइले नै समन्वय गर्नेछ,’ उनले भने, ‘विपद प्राधिकरणको इकाइको रुपमा रहने भएकोले यो कार्यालयले भूकम्पबाहेक बाढी, पहिरोजस्ता विपदबाट प्रभावितहरुको घर पुनर्निर्माण र मर्मतको काम पनि गर्ने छ ।’ उनले लाभग्राही पहिचान तथा छनोट गरी पुनर्निर्माणको अभियानलाई द्रुत बनाउन स्थानीय तहले भूमिका खेल्नु पर्ने बताए ।

कार्यालयमा प्रमुख र प्राविधिकसहित चार जना कर्मचारी रहने प्राधिकरणका कार्यकारी प्रमुख भिष्मकुमार भुसालले बताए । २०७२ सालको भूकम्प पछिको पुनर्निर्माणमा अनुभव हासिल गरिसकेका प्राविधिक सहितको टोलीले जिल्ला प्रशासन कार्यालय र स्थानीय तहका प्राविधिकहरुसँग समन्वय गरेर पुनर्निर्माण गर्ने भुसालले बताए । ०७९ मा डोटी र ०८० मा बझाङ केन्द्रविन्दु भएर गएका भूकम्पका कारण बझाङ जिल्लाका १२ हजारभन्दा बढी घरमा क्षति पुगेको थियो ।

भूकम्पबाट पूर्ण क्षति भएका घरको पुनर्निर्माण तथा चर्किएका घरको मर्मत गरेर प्रबलीकरण गरिने भूकम्पीय पुनर्निर्माण तथा पुन:स्थापना आयोजना कार्यान्वयन इकाइले जनाएको छ ।