डोटी–  दिल्पेश्वर स्पोर्ट्स क्लब दिपायल, डोटीको आयोजनामा यहि माघ १० गते बाट हुन गइरहेकोे दोस्रो संस्करणको खुल्ला पुरूष भलिबल प्रतियोगीता “दिल्पेश्वर भलिबल लिग (DVL-2)” का लागि सम्पूर्ण तयारी पुरा भएको छ ।

“दिल्पेश्वर खेल मैदान मठ, दिपायल” मा आयोजना हुने लिगका लागि आवश्यक सामाग्रीहरूको सम्पूर्ण तयारी पुरा गरिसकेको र क्लबले वेवसाइट मार्फत टिम दर्ताको प्रक्रिया समेत सुरु गरिसकेको “दिल्पेश्वर भलिबल लिग (DVL-2)” व्यवस्थापन समिति संयोजक मनोहर माझीले जानकारी दिनुभयो ।

प्रतियोगीताका लागि प्रथम पुरस्कार ट्रफी सहित १ लाख ५१ हजार १ सय ११ , दोस्रो पुरस्कार ६१ हजार १ सय ११ , तेस्रो पुरस्कार २८ हजार १ सय ११ तथा अन्य विधाहरूमा समेत पुरस्कारको व्यवस्था गरिएको छ ।

गत बर्ष पहिलो संस्करणको भलिबल लिग प्रतियोगीता सफलता पूर्वक सम्पन्न गरेपछि क्लवले यसबर्ष अझै स्तरीय प्रतियोगीता आयोजना गर्ने तयारी गरिरहेको क्लबका उपाध्यक्ष लोकेन्द्र कठायतले बताउनु भयो ।

खेलाडी र दर्शकहरुलाई आर्कषित गर्न क्लवले प्रतियोगीता संगै सांस्कृतिक मेलाको समेत आयोजना गर्ने भएको छ ।

डोटेली संस्कृति झल्कने हुड्केउली, देउडा, भूवा, चौलो, रन पुतला, लाखेनाच, पञ्चे बाजा, छलिया बाजा लगायतका सांस्कृतिक झाँक्रीहरू प्रदर्शन हुनेछन् ।

क्लबले मुख्य प्रायोजक, प्रायोजक देखि मिडिया पार्टनर, अफिसियल हस्पीटल, होटल लगायत समेत छनोट गरिसकेको छ ।

मिडिया पार्टनरका रुपमा शनिबार मात्रै पाँजलो अनलाइनसंग सम्झौता गरेको क्लबले एचडी क्वालिटीमा सम्पूर्ण खेलहरुको प्रत्यक्ष प्रशारण गरिने जानकारी दिएको छ । प्रतियोगीताका लागि आर्थिक स्रोतको अभाव झेली रहेकाले सहयोगी हातहरु खोज्ने अभियान भने जारी रहेको बताइएको छ ।