नयाँ दिल्ली- भारतीय हवाई सेवा प्रदायक कम्पनी इन्डिगोको कोलकता उडेको जहाजलाई आकस्मिक अवतरण गराएको छ । विमानभित्र बम राखिएको धम्की आएपछि बिहीबार बिहान रायपुर विमानस्थलमा विमानको आकस्मिक अवतरण गरिएको हो ।

सो विमानभित्र १८७ जना यात्रु र ६ जना क्रु मेम्बर रहेको प्रहरीले बताएको छ । विमान नागपुरबाट कोलकताका लागि उडेको थियो ।

विमानस्थलका अधिकारीहरूले धम्की पाएपछि विमानलाई रायपुरमा अवतरण गरिएको रायपुरको एसएसपी सन्तोष सिंहले बताए ।  विमान बिहान ९ बजेपछि रायपुर विमानस्थलमा अवतरण भएको थियो । सुरक्षा जाँचका लागि अलग्गै राखिएको अधिकारीहरूले भनेका छन् । प्राविधिक कर्मचारी र बम स्क्वाडले विमानको राम्रोसँग जाँच गरिरहेको बताइएको छ ।